Выданне «Радыёлетапіс краіны. Беларускае Радыё – 100 гадоў у эфіры» ўяўляе сабой маштабнае навуковае даследаванне і глыбокі гістарычны нарыс, заснаваны на багацейшых архіўных фондах. Кніга падрабязна асвятляе асноўныя этапы станаўлення і развіцця айчыннага радыёвяшчання – ад першага сігналу ў 1925 годзе да ўкаранення сучасных лічбавых тэхналогій. Прадстаўленая кніга дэманструе выдатную ролю Беларускага радыё ў грамадска-палітычным і сацыяльна-культурным жыцці краіны на працягу цэлага стагоддзя.
Асаблівую каштоўнасць выданню надаюць унікальныя фотадакументы і рэдкія кадры, якія захавалі працу дыктараў розных эпох, будаўніцтва першых радыёмачт і закуліссе сучасных студый. У тэксце арганічна пераплятаюцца дакументальныя сведчанні ключавых вех гісторыі – індустрыялізацыі, калектывізацыі, гераічнай барацьбы народа ў гады Вялікай Айчыннай вайны і этапаў станаўлення суверэннай Рэспублікі Беларусь – з «жывымі» гісторыямі пра людзей, чые галасы сталі роднымі для мільёнаў слухачоў.
Кніга падрыхтавана пры актыўным удзеле вядучых архіўных і музейных устаноў краіны. Яна багата ілюстравана матэрыяламі з фондаў Беларускага дзяржаўнага архіва-музея літаратуры і мастацтва, Беларускага дзяржаўнага архіва кінафотафонадакументаў, Нацыянальнага гістарычнага музея Рэспублікі Беларусь, Музея гісторыі Вялікай Айчыннай вайны, Прэзідэнцкай бібліятэкі, літаратурных музеяў Якуба Коласа і Янкі Купалы, а таксама архіва Белтэлерадыёкампаніі.
У прэзентацыі прынялі ўдзел аўтары і складальнікі юбілейнага выдання, прадстаўнікі Міністэрства інфармацыі Рэспублікі Беларусь, Саюза пісьменнікаў Беларусі, Беларускага саюза журналістаў, выдавецтва «Беларусь», генеральнага прадзюсарскага цэнтра Беларускага Радыё. Героі публікацый і стваральнікі кнігі падзяліліся цікавымі фактамі аб працы над праектам і адзначылі значнасць захавання гістарычнай памяці аб голасе нашай краіны.
Падчас мерапрыемства дырэктару БДАМЛМ быў уручаны асобнік кнігі “Радыёлетапіс краіны. Беларускае Радыё – 100 гадоў у эфіры”, якая зойме пачэснае месца ў бібліятэчным фондзе архіва-музея.
