23 сакавіка 2023 года члены першаснай прафсаюзнай арганізацыі Беларускага дзяржаўнага архіва-музея літаратуры і мастацтва наведалі выставу Нацыянальнага цэнтра сучасных мастацтваў Рэспублікі Беларусь і галерэі FARBA “Искусственный интеллект: художник или машина?”.
Крыштаповіч Сяргей Яўгенавіч, дырэктар цэнтра сучасных мастацтваў, правёў цудоўную экскурсію па калекцыі з больш чым 90 работ у розных катэгорыях, якія ахопліваюць прыроду, міфалогію, архітэктуру і многія іншыя. Унікальная экспазіцыя ўяўляе сабой пастаяннае проціпастаўленне штучнага інтэлекту і чалавека: работы машыны размешчаны насупраць работ таленавітых сучасных беларускіх мастакоў – Уладзіміра Гаца, Данііла Граковіча, Соф’і Дзічанкавай, Уладзіміра Кандрусевіча, Дар’і Румянцавай, Таццяны Савік, Віталя Бондара.
Калі акунаешся у свет супрацьстаяння чалавека і штучнага інтэлекту, разгадваеш на выставе розныя галаваломкі ў выглядзе квэста, не заўважаеш, як даходзіш да апошніх залаў, дзе прадстаўлены варыянты развіцця будучыні. Завяршае экспазіцыю імерсіўны фільм “Digital evolution” (“Лічбавая эвалюцыя”), які падводзіць вынік усёй выставе, адлюстроўвае адзін з верагодных развіццяў чалавецтва, дзе адбываецца зліццё жывога арганізма і машыны.
