26 красавіка 1986 года здарылася катастрофа на Чарнобыльскай АЭС. Падзея, якая мае асаблівае значэнне не толькі для Беларусі, але і для ўсяго свету. У гэтыя красавіцкія дні мы ўспамінаем тых, хто спыніў радыяцыйную стыхію і прадухіліў развіццё катастрофы. Тых, хто ахвяраваў сабой, выконваючы свой прафесійны абавязак.
Чарнобыльская катастрофа знайшла адлюстраванне ў шэрагу твораў беларускай культуры і мастацтва. У фондах Беларускага дзяржаўнага архіва-музея літаратуры і мастацтва захоўваецца багата творчых дакументаў дзеячаў літаратуры, якія прысвечаны гэтай тэме: аповесці і апавяданні, вершы, артыкулы і нататкі, дакументы па вытворчасці фільмаў і інш.
