У сценах архіва-музея, каб засведчыць павагу і добрую памяць пра выдатнага майстра слова і знакавую постаць айчыннай культуры, сабраліся паэты, акцёры, навукоўцы і іншыя прыхільнікі яго творчасці.
З вітальным словам выступіла дырэктар БДАМЛМ Алена Макаранка. Яна адзначыла знакавасць асобы Генадзя Бураўкіна, а таксама падкрэсліла наяўнасць багатага асабістага фонду паэта, што захоўваецца ў архіве-музеі.
Галоўны рэдактар часопіса “Роднае слова” Наталля Шапран распавяла пра сталы інтарэс выдання да асобы і творчасці Генадзя Бураўкіна, прасачыла развіццё навуковай і папулярнай думкі аўтараў часопіса за апошнія дзясяткі гадоў, адзначыла актуальнасць вывучэння творчасці паэта, прэзентавала новы нумар “Роднага слова”, цалкам прысвечаны Генадзю Мікалаевічу. Вераснёўскі часопіс вось-вось выйдзе з друку.
Галіна Левіна падзялілася з прысутнымі ўспамінамі пра сяброўскія стасункі знакавых творцаў свайго часу – паэта Генадзя Бураўкіна і архітэктара Леаніда Левіна. Галіна Леанідаўна перадала ў фонды БДАМЛМ кнігу свайго бацькі “Мгновения” (2013), якую рэдагаваў Генадзь Мікалаевіч.
Сяргей Шапран – даследчык, аўтар і ўкладальнік шматлікіх кніг, прысвечаных многім дзеячам беларускай літаратуры, у тым ліку Генадзю Бураўкіну, – распавёў пра сяброўства з паэтам, а таксама расказаў шчымлівую гісторыю выдання яго апошняй прыжыццёвай кнігі “Нагаварыцца з зоркамі” (2014), якую, дзякуючы намаганням сяброў, Генадзь Мікалаевіч паспеў патрымаць у руках. Асобнік быў надрукаваны за адну ноч у адным экземпляры. Сяргей Шапран перадаў у фонды БДАМЛМ як тое выданне, так і многія іншыя. На вечарыне фонды архіва-музея папоўніліся яшчэ дзвюма кнігамі, якія выйшлі адмыслова да 90-годдзя паэта. Гэта перавыданне кнігі “Нагаварыцца з зоркамі” (2026), а таксама “Пражытае-напісанае” (2026). Сюрпрызам для прысутнага на вечарыне Сяргея Зуёнка быў падарунак для яго бацькі Васіля кнігі “Паміж зоркай і свечкай” (2000), што падпісаў некалі сам Генадзь Мікалаевіч свайму сябру ў 2005 годзе.
Успамінамі пра Г.Бураўкіна падзяліліся паэт Навум Гальпяровіч і пісьменнік, навукоўца Анатоль Астапенка.
Куратар выставы “Іду да вершаў пешшу…” вядучы архівіст БДАМЛМ Наталля Мізон прэзентавала дакументы з фондаў архіва-музея, распавёўшы пра паэта Генадзя Бураўкіна, якія з’яўляецца годнасцю і гонарам беларусаў.
Архіў-музей выказвае ўдзячнасць усім удзельнікам мерапрыемства і запрашае даследчыкаў і аматараў беларускай літаратуры наведаць экспазіцыю “Іду да вершаў пешшу...”.
