В.Д.Рубінчык нарадзіўся 17 красавіка 1940 года ў Мінску, у сям’і музычнага і тэатральнага дзеяча Давіда Ісаакавіча Рубінчыка. У 1962 годзе скончыў рэжысёрскі факультэт Беларускага тэатральнага інстытута і ў 1969 годзе - рэжысёрскі факультэт УДІКа. Працаваў рэжысёрам на кінастудыі “Беларусьфільм”, з 1990 года — на "Масфільме". Выкладаў ва УДІКу. У 1999 годзе В.Д.Рубінчык узначаліў майстэрню рэжысуры кіно і тэлебачання ў Інстытуце сучаснага мастацтва ў Маскве, а з 2004 года стаў дэканам факультэта рэжысуры кіно і тэлебачання ў гэтай ВНУ. Пайшоў з жыцця 2 сакавіка 2011 года ў Маскве. Зняў больш за два дзесяткі мастацкіх кінастужак, сярод якіх «Красный агитатор Трофим Глушков», «Могила льва», «Последнее лето детства», «Дикая охота короля Стаха» і многія іншыя.
Вядучым вечара з’яўлялася Антаніна Аляксееўна Карпілава — кандыдат мастацтвазнаўства, дацэнт і загадчык аддзялення экранных мастацтваў Цэнтра даследавання беларускай культуры, мовы і літаратуры Нацыянальнай акадэміі навук Беларусі.
З прывітальным словам да ўдзельнікаў мерапрыемства выступілі генеральны дырэктар “Кінавідэапракату” У.М.Карачэўскі і генеральны дырэктар Нацыянальнай кінастудыі “Беларусьфільм” Дз.С.Сямёнаў. Сваімі ўспамінамі аб рабоце з кінарэжысёрам В.Д.Рубінчыкам падзяліліся рэжысёр, акцёр і сцэнарыст, Заслужаны дзеяч мастацтваў БССР В.А.Нікіфараў, гукарэжысёр Д.С.Морс і іншыя.
Гасцям мерапрыемства быў прадэманстраваны фільм “Вянок санетаў”, зняты В.Д.Рубінчыкам у 1976 годзе па матывах аповесці Віктара Муратава “Мы ўцякалі на фронт”.
